سائقوا الميكروباص : " الحكومة هتدمرنا " .. ومواطنون يطالبون بالرحمة

" قبل ما نطلع الأجرة بجنية ، علشان البنزين غلّى واللى مش عاجبه ينزل " بهذه العبارة بدأ عمرو ، سائق ميكروباص بمحافظة الدقهلية ، حمولته صباح اليوم ، معللاً سبب زيادة الأجرة من نصف جنية إلى جنية إلى قرار مجلس الوزراء برفع الدعم عن الغاز والسولار والبنزين بالأمس ، يتلاقها الركاب بغضب وإنفعال وتتبادل الحوارات والمشاحنات بين الركاب والسائق ، فتقول سيدة أربعنية " هيعملوا فينا أيه ، جايين على الغلابة اللى دخلهم 200 جنية ويخدوا منهم ، مايسبونا فى حالنا بقى " .

" الراكب مش بأيده حاجة ، كده كده هيدفع علشان يشوف مصلحته " يقولها بسخرية ، مصطفى حسانين ، أحد السائقين ، مؤكداً ان البنزين اذا وصل سعره إلى 150 جنيه سيقوم بشرائه ، وكله شىء سيكون على عاتق الركاب .

يعترض على كلامه على مقبل ، سائق ، قائلاً " الأول بـ 75 جنيه كنت أشترى ثلاث صفائح جاز للعربية ، دلوقتى صفحتين بـ 75 جنية ، الصفيحة زادت 14 جنية ، الحكومة هتدمرنا لما البنزين كان بيغلّى 2 جنية كانت الأجرة بتزيد ، دلوقتى 14 جنية الزبون هو اللى بيدفع وإحنا كمان هنتبهدل ، حسبى الله ونعم الوكيل الغلاء هيرجع السرقة وكل حاجة هتغلى " .

ويضيف أحد المواطنين " يرحمونا من اللى إحنا فيه ، يشوفوا رجال الأعمال يخدوا منهم ضريبة مش يخدوا مننا إحنا ".

بنبرة هادئة يقول ، الحاج شربينى ، سائق توكتوك فى الستين من عمره " أنا كل ما أروح البنزينة يقولوا مفيش ، علشان يبعوه لتجار السوق السودا ، وبضطر أنا أشترى منهم بسعر عالى ، طبيعى هزود الأجرة ، هنعمل أيه ..؟ ".

مضيفاً أنه يحصل على 400 جنيه معاش يصفهم " بالملاليم " و يسكن بالإيجار 500 جنيه بالإضافة إلى الكهرباء والمياه والمصاريف اليومية ، وليس لديه باب رزق أخر سوى التوكتوك ، مطالباً الحكومة بتحسين المعاشات قبل غلاء الأسعار .

وفى المقابل ، أوضح المهندس إبراهيم محلب ، رئيس مجلس الوزراء ، خلال المؤتمر الذى عقد بالأمس أن "العدالة الاجتماعية لا تتحقق بدعم الأغنياء وكان لا بد من تحريك الدعم"، مؤكدًا أن الفقير هو من يدفع الدعم للغني بشكل غير مباشر، موضحًا أن هدف الحكومة بتحريك أسعار الوقود هو تحقيق عدالة التوزيع. الأمر الذى يعتبره المواطنون " كذباً وان الحكومة تلجأ إلى هذة الأساليب لحل مشكلاتها على حساب الفقراء .